مرايه ونتيجه وساعه

عندك مراية في بيتكم؟
طب معلق نتيجة على الحيطة جنب الساعة اللي بتعد ساعات العمر؟

معاك ورقة وقلم أو فاتح Word على الكمبيوتر مش فارقة!
جواك شجاعة كبيرة وقادر تواجه أخطر الحقائق وأشدها فزعا؟

لو
إجابتك عن كل الأسئلة اللي فاتت دي بأيوه..
يبقى حلو قوي شمر بقى كم القميص وخش في الموضوع عدل..

أما لو
كانت الإجابة عن نفس الأسئلة بـ"لا"..
فإحم.. يبقى شمر كم القميص وخش برضه في الموضوع عدل!
تخيل إنك قعدت مع نفسك على انفراد
-أيوه انفراد بعد الفطار-..
الحوار بقى هيكون شكله إيه..
كده..؟؟
ّّ
أنت: مساء الخير
نفسك: يسعد مساك يا سيدي.. نعم أي خدمة؟

أنت: بالراحة عليّ شوية.. عادي يعني.. كنت عاوز نقعد مع بعض شوية.
نفسك: ليه يعني صاحبي.. صديقي.. خطيبي.. جوزي ومخلفة منك عيال!

أنت: يا ستي ده إنتِ نفسي.. مش لازم يعني يكون فيه سبب عشان نتكلم مع بعض..
نفسك: اتفضل يا سيدي.. سمعني..

أنت: مش عارف.. حاسس إن أنا غلطت لما اتخانقت مع ماما النهارده الصبح..
نفسك:مش هي يا سيدي اللي مارضيتش تديك فلوس عشان تشتري كتب الجامعة..

أنت: إنت هتستعبطي ولا إيه.. ما أنا وإنت عارفين إني خدت منها فلوس الكتب قبل كده 3 مرات بعد ما أخدتهم من بابا 4 مرات وبرضه ماشترتش الكتب!
نفسك: آه والله في دي عندك حقك.. ما هو إنت اللي بتصرف فلوسك دايما على البنات، ده حتى في رمضان قال إيه بتجيب لهم شيكولاتة وابقوا كلوها بعد الفطار وافتكروني.. سم كده!

أنت: طب خلاص خلاص هو لازم يعني تشدي عليّ كده في كل مرة.. خلاص ماعدتش هاعمل كده تاني.. بس لازم أعتذر لماما صح.. صح؟
نفسك: طبعا.. قوم هز طولك بدل ما إنت قاعد قدامي كده.. روح يا شيخ.. جيل فاشل يقطع الخلف!
***
ولاّ كده؟

***

أنت: مساء الخير
نفسك: مساء الخير يا عسل.. ما تاخد لك نفس طيب.. كح كح!

أنت: لا يا ستي.. ما هو أنا أصلا جاي لك عشان كده.
نفسك وهي تنفخ الدخان في وجهك: فووووووو.. وماله يا حبيبي اتفضل اتفضل..

أنت: بصراحة... أنا عاوز أبطل شرب سجاير وشيشة..
تقف نفسك في قلب الصالة وهي تضع يدها في وسطها قائلة لك: نعم يا عمر.. تبطل شرب!

أنت: عمر مين يا ستي.. إنتِ نسيتِ اسمي ولاّ إيه.. وبعدين فيها إيه.. أيوه أنا عاوز أبطل شرب سجاير وشيشة.. بصراحة باصرف عليهم فلوس بالهبل وصحتي بقت زيرو.. ده أنا لما باطلع السلم بانهج وكأني شايل جبل المقطم على صدري.. وأنا ساكن في الدور التاني ما بالك بقى لو كنت ساكن في الدور الخامس ولا السادس؟!
نفسك: عادي يعني هتحس إنك شايل جبل المقطم والجبل الأخضر.. جيل مرق خيخة!

أنت: قولي عليّ زي ما تقولي.. بس أنا قررت.. مافيش سجاير ولا شيشة بعد النهارده، إيه قولك بقى؟
نفسك: خلاص يا عم إنت أدرى بنفسك.. بس اسحب لك نفس من السيجارة دي طالما هتبطل بقى..

أنت: يا ستي باقول لك هابطل هابطل..
نفسك: يعني كنت كابتن مصر وهتبطل كورة ما تبطل يا سيدي.. باقول لك ده آخر نفس، مالوش تأثير يعني..

أنت: تفتكري؟
نفسك تشير لك بعلامة "كده" ثم تقدم لك السيجارة التي تلتقطها في سرعة أدهشتك أنت شخصيا.. لحظات ويمتلئ المكان بالدخان.. كح كح.. مش تفتح شيش البلكونة طيب؟!
***
شفت بقى، آدي الحوارات ولا بلاش!

عرفت ليه لازم يكون عندك في البيت ساعة ونتيجة..؟
عشان تبص على الأيام اللي راحت من عمرك..

وعرفت ليه إنت محتاج مراية؟
عشان تشوف فيها نفسك على حقيقتها.. وتقف قصادها وتسألها هي الأيام والساعات اللي راحت دي راحت في إيه؟ والأفعال اللي قمت بيها كانت صح ولا غلط؟
خايف؟
ماتخافش.. صحيح إن كتير من الحكماء قالوا إن أكبر عدو ممكن تقابله في حياتك هو نفسك، وصحيح كلنا عارفين إن النفس -عادة- ما تأمر صاحبها بالسوء، بس خليك شجاع، واستفيد من أيام شهر رمضان الحلوة المباركة دي.

أيوه أيام شهر رمضان اللي كتير فينا بيعتبرها "نقطة فاصلة" بتغير حاجات كتيييييييييير قوي في حياته..

أيام شهر رمضان اللي النفوس بتكون فيها أهدأ..

واللي الناس بتكون فيها أقرب إلى ربنا..
وبالتالي بتكون أقدر على إنها تكون صادقة مع نفسها..

فاقعد مع نفسك وحاسبها بالورقة والقلم..

لقيت نفسك غلطان..
عادي ماتزعلش..اعرف إنك غلطت وحاول تصحح الغلط ده لو تقدر.. ماقدرتش والوقت فات.. خليك فاكر وأكيد عمرك ما هتغلط نفس الغلطة دي تاني..

لقيت نفسك عملت حاجات كتير صح وخير
–وده صعب يعني بس ما علينا!- حلو قوي.. اثبت على كده يا عم.. ودرب نفسك على فعل الخير وحب عمله..

يعني في الحالتين إنت كسبان كسبان..

محاسبة النفس دي زي كده ما الواحد يكون عنده قميص -ولا مؤاخذة- مش نضيف.. وبعدين يغسله بمسحوق معتبر.. بعدها يرجع أبيض زي الفل.. زي الأول بالظبط.. صحيح القميص ممكن يتوسخ تاني.. بس ممكن برضه مايتوسخش والأهم.. إنه رجع أبيض..

احكِ لنا وقل لنا..
قعدت مع نفسك قبل كده وحاسبتها..
والنتيجة كانت إيه طيب

ولو قعدت دلوقت مع نفسك
-بمناسبة الشهر الفضيل اللي احنا فيه-
وعملت معاها كشف حساب..

يا ترى هتقول إيه والنتيجة هتكون إيه؟
منتظر تعليقاتكم ومشاركتكم

بصراحه موضوع جميل يا احمد
اسلوبك فى الموضوع جميل جدا
ماشاء الله بدايتك فى المنتدى بدايه مبشره
وفعلا انا مش بجاملك انت فعلا طلع عندك فراسه فى الكلام فاكر لما قولت كده
ربنا يكرمك ويجعل شهر رمضان شهر العتق من النار والرجوع فيه الى الله

اقتباس :

إنت هتستعبطي ولا إيه.. ما أنا وإنت عارفين إني خدت منها فلوس الكتب قبل كده 3 مرات بعد ما أخدتهم من بابا 4 مرات وبرضه ماشترتش الكتب!

هههههههههههههههههههههههههههههه


جميل والله الموضوع ..
شكرااااااااا

ربنا يخليكى يا امينه قولى يا رب 0
الفراسه اللى عندى دى جزء صغير من اللى عندك يا أساتاذه0وربنا يبارك لنا فيها0ردك كنت مشتاق انى اعرفه علشان الفراسه المشتركه اللى بينا وشكرا على دعائك ليا وانا والله محتاج لدعائك وانا هدعيلك بس مش لازم اعرفك انا هدعى اقول ايه ده سر بينى وبين ربى فى صلاه القيام والفجر وانا ساجد بين ايد سيدى هدعيلك وهدعى لكل شباب المسلمين وانتى بالذات بس مش هقول لك انا هدعى اقول ايه 0شكرا على ردك واهتمامك يا امينه0وعايزين نشوف لك مواضع اعودينى يا امينه بكده علشان اشوف الفراسه اللى عندك هتوديكى لحد فيييييييييين؟

آه والله في دي عندك حقك.. ما هو إنت اللي بتصرف فلوسك دايما على البنات، ده حتى في رمضان قال إيه بتجيب لهم شيكولاتة وابقوا كلوها بعد الفطار وافتكروني.. سم كده!

هههههههههه
جميل موضوعك بجد يا احمد وطريقه الثرد فيه والاسلوب جميل جدا جدا
بدايه مبشره ربنا يكرمك وتكمل كده فى المنتدى وتعملنا مواضيع جميله زى دى
انا بقى من الناس اللى بتحاسب نفسها كتير اوى اوى ودايما مش راضيه عن نفسى ومتخانقه معاها ربنا يعينا كده ونتصالح ادعولنا انتم بس هههههههه
وشكرا تانى يا احمد على موضوعك

ربنا يهديكى يا نفس بليله يا رب0ليه بس بتتخانقى مع روحك وحبيبتك وحياتك بليله0حد يزعل من بليله يا( نفس)0انتى يمكن بس بتزهقى من كتر كلامها صح ههههههههههههههههه0هى اعترفت وقالت انا مبريحش نفسى وبعرفش اقعد ساكته بس يا نفس بليله احنا حبيناكى علشان انتى داخل انسانه راااااائعه0شكرا يا بليله0

قولها يا احمد يمكن تسمع كلامك وتسبنى فى حالى ههههههههههههه
.ومتشكره اوى على الكلام الجميل ده