مهم جدا لجميع الاعضاء ادخل بسرعة

بسم الله.. والصلاة والسلام على خير خلق الله.. محمد بن عبد الله.. صلى الله عليه وسلم واله وصحبه ومن تبعه ومن والاه


الحمد لله رب العالمين.. والصلاة والسلام على مسك الختام للنبيين ..محمد النبى الأمى الأمين.. صلى الله عليه وسلم أفضل صلاة وأتم تسليم.

اما بعد.........



لقد هل علينا رمضان بما يحمله من نفحات، وبركات، وخيرات ،وما نجنيه من ثمرات الحسنات، على ما نؤديه من الطاعات.

ولا شك ان من اهم ما يميز هذا الشهر الكريم هى صلاة التروايح

نعم صلاة التراويح علم من اعلام رمضان
صلاة التراويح" التى ومن اسمها يروح الانسان فيها عن نفسه "
فيشعر براحة فى نفسه وشرح لصدره وحياة لقلبه .

وايضا من مظاهر هذه الطاعة خروج جموع النساء ساعيات اليها راجيات رضى رب البريات .

فارى امى واختى وزوجتى وبنتى " بعد ما يفطرونا طبعا " قاصدات المساجد فى مظهر يشرح الصدر وربى .

ترى البسمة على الوجوه بل تكاد القلوب ان ترقص من الفرحة والبهجة


نعم
اى وربى انها لنفحات رمضان لا غيره .

الله يتقبل ان شاء الله .


وتدخل النساء المكان المخصص لصلاتهن ينتظرن الصلاة حتى تلتقى كل واحدة منهن بربها تنفرد به فى عزلة عن العالم حولها .
نعم تلتقى بربها تكلمه ويكلمها من خلال القران وتناجيه من خلال الدعاء.

ما اجمله من لقاء .

ولكن .........

ماذا لو لم يتقبل الله منك يا اختى ؟
هل فكرتى للحظة فى هذا الامر ؟

لا يتقبل الله منك طاعتك
لا صلاتك
ولا دعائك
ولا سعيك للمسجد
ولا مناجاتك له ولا بكائك من خشيته
ولا مكوثك فى المسجد تنتظرين الصلاة ؟
ماذا لو كان هذا ؟

ما هو شعورك الان ؟
كيف تشعرين الان وقد حرمت كل هذا ؟
كيف تشعرين وقد حرمت الرحمة والمغفرة والعتق من النيران ؟
كيف تشعرين وقد حرمت جنة خازنها رضوان ؟
كيف تشعرين وانت من اهل الحرمان ؟
كيف تشعرين ولم يتقبل منك القيام؟
............................................................

يا هذا..
مالك تخاطبى هكذا .
فلماذا لا يتقبل الله منى ؟
لماذا احرم الجنان ؟
لماذا لا احظى بالرضوان ؟
لماذا لا اعتق من النيران ؟
فانى دوما من قارئى القران
و بالنهار من اهل الصيام.
وبالليل لا اكون من ضمن النيام .
بل قائمة اصلى لربى مع اهل اقيام .

لماذا ؟
لماذا؟

.........

اقول لكى اختى انها الغيبة .

نعم الغيبة




نقلب بقى عامية " كفاية لغة عربية لانى لا اجيدها "

تعالولى بقى


تلاقى الواحدة رايحة المسجد يا اخواتى وناوية تاخد بالها من فلانة دى اللى كانت امبارح مش عارف لابسة ايه وكانت عاملة ايه
ولبسها مش عارف ماله " العباية بتلمع كلها وسايبة اظافرها وملوناهم مش عارف بايه.
شوفتى الكعب اللى لابساه ده طوله اد ايه
ده شعرها باين من الطرحة
ولا الدهب اللى لابساه ده اللى بيعمل صوت ومش بنعرف نركز فى الصلاة
دى ربنا مش هيتقبل منها
دى جاية تتمنظر مش جاية تصلى
دى .........
دى .............
دى.............


الخ......... " اللى طبعا النساء تعرفو اكتر منى


وطبعا ده مش بيكون كده مع نفسها
لا طبعا
بتقول لفلانة
وفلانة
وفلانة
وتشتغل الغيبة فى المسجد

اى وربى فى المسجد
غييييييييبة فى المسجد.

استغفر الله العظيم
يعنى انتى رايحة تصلى ورايحة بيت الله ورايحة تطيعيه فتعصيه بكلامك هذا" بالغيبة".


طيب يا ستى بدل مانتى شغالة غيبة كده واخدتى انتى سيئات واذهبتى الصلوات واضعتى الحسنات ولم تقبل منك الطاعات
ماذا لو خفتى على نفسك وعلى اختك فى الله !
فتتقدمى لها محبة ناصحة باداب النصيحة لعلها يا ستى مش اخده بالها من المخالفات دى


بينك وبينها كده مش على الملأ وتفضحيها وتهينيها وتحرجيها



" تغمدنى بنصحك فى انفراد........وجنبنى النصيحة فى الجماعة
فان النصح بين الناس نوع.......... من التوبيخ لا ارضى سماعه
فان خالفتنى وعصيت امرى........ فلا تجزع اذا لم تعط طاعة "


لو عندك الملكة والاسلوب المؤثر فى الغير... يبقى تقدمى على بركة الله تنصحيها لا ان تغتابيها
مش عندك يبقى تيجى كده على جنب وانتو داخلين او وانتو خارجين تقدميلها هدية ملفوفة كده جميلة " وقولى كل سنة وانتى طيبة " رمضان كريم
وسيبيها لما تروح لتفتح هديتك فتجدها عبارة عن كتيب جميل او شريط لعالم جليل يجيد فن النصح وتوصيل المعلومة .


والله العظيم وانا باقسم وربى من نفسها تانى يوم هتلاقيها جاية مش عاملة كل المخالفات دى خالص ومبسوطة وفرحانة وتدعى ليكى كمان .

مش هتقدرى على دى كمان يبقى تدعيلها
ايوة تدعيلها ربنا يهديها ويصلح حالها والمسلمين اجمعين .
لكن تغتابيها " هى دى الكارثة "


. لااااااااااااااااا للغيبة فى المساجد
لا للغيبة فى المساجد.

مضيعيش رمضان منك

انتى الخاسرة
فانه خاب من خسر رمضان
اى وربى خاب وخسر واى خسارة
انه شهر المغفرة
شهر الرحمة
شهر العتق من النيران


عاوزة تضيعى كل ده منك علشان كلمة بتقوليها على اختك المسلمة " اغتبتيها " وفيييييييين ؟
فى بيت الله ؟

لا اظن ان هناك عاقلة تريد هذا
واظنك عاقلة

موضوعك جميل جدا يا عبد العزيز ..
بس عاوز اوضحلك حاجه .. انت نزلت الموضوع ده فى المكان الغلط .. يعنى فى قسم استراحة .. والقسم ده للترفيه واللعب والحجات دى ..
يعنى كان ممكن تنزله فى فضفضة او الأخص فى الخيمة الرمضانية .. اوك

شكراااااااااااااا ,, نورت المنتدى

شكرا محمد وربنا يخليك على التوضيح دة انا كنت لسة جديد فى المنتدى

جميل موضوعك اوى يا لذيذ وربنا يجعلنا كلنا من العاقلين يارب ويحفظنا من الغيبه

lazez2007 كتب:

شكرا محمد وربنا يخليك على التوضيح دة انا كنت لسة جديد فى المنتدى

العفو يا عبدالعزيز ..
احنا كل اللى يهمنا كلنا هيا مصلحة المنتدى .. وأيضا الأعضاء الاعزاء

ماشاء الله يا عبدالعزيز موضوعك مهم جدا
انا الحمد لله والشكر لله بنزل اصلى التراويح بس عمرى ما كلمت حد
بجد معرفش ليه بروح واجى ولا بتكلم مع اى حد خالص فى الجامع
مبعرفش اعمل علاقات مع حد معرفوش
وعلى فكره كده احسن عشان فعلا ابعد عن الغيبه
ربنا يحفظنا منها
واهلا بيك معانا فى المنتدى ويارب يكون المنتدى عجبك

جزاك الله خيرا استاذ عبد العزيز
موضوعك هايل جدا
بس فى حاجة حضرتك ليه اتكلكت على النساء بس انهم بيغتابوا
الرجال بقا ادهى وامر
وربنا يصلح حال الجميع