منتدى جامعة الأزهر
هذه الرسالة تفيد بأنك غير مسجل بالمنتدى تفضل بالدخول على اشتراكك ان كنت عضو لدينا او قم بالنقر على زر التسجيل لتصبح عضو معنا
منتدى جامعة الأزهر
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.


منتدى خاص بجامعة الازهر للتعليم والدراسه من خلاله
 
الرئيسيةالتسجيلدخول

 

 خلى بالك

اذهب الى الأسفل 
كاتب الموضوعرسالة
بليلة بالمكسرات
أزهري فعال جدا
أزهري  فعال جدا
بليلة بالمكسرات

عدد المساهمات : 270
تاريخ التسجيل : 10/08/2007
العمر : 32

خلى بالك Empty
مُساهمةموضوع: خلى بالك   خلى بالك Emptyالإثنين سبتمبر 17, 2007 10:18 am

فَاذْكُرُونِي أَذْكُرْكُمْ وَاشْكُرُواْ لِي وَلاَ تَكْفُرُونِ (52)

كنت دايمًا بفكر في الآية دي وأقول.. هو ربنا -والعياذ بالله- بينسى ؟ طب إيه "أذكركم" دي كنتيجة إننا نفتكر ربنا ؟
لغاية ما من كام يوم عرفت إن "أذكركم" دي مش بمعنى إنه يفتكر بعد ما نسي.. بمعنى إنه يهتم بينا ويكون في صالحنا.. بمعنى إن ربنا عارف أحوال الناس كلها.. وبيحاسب الناس كلها زي بعض.. لكن الناس اللي بتفتكره.. الناس اللي بتحطه أولوية عندها.. الناس دي هو بيكرمهم أوي..
إذا كنت أنا لو أم وحسيت إن واحد من ولادي بيهتم بيا زيادة عن التانيين بدّيله "عناية خاصة".. ما بالك بقى بربنا لما يحس إن انتا على باله على طول.. وإن هو أكتر حاجة انتا بتراعيها في حياتك ؟
* * *

وَمِنَ النَّاسِ مَن يَتَّخِذُ مِن دُونِ اللَّهِ أَندَادًا يُحِبُّونَهُمْ كَحُبِّ اللَّهِ وَالَّذِينَ آمَنُواْ أَشَدُّ حُبًّا لِّلَّهِ وَلَوْ يَرَى الَّذِينَ ظَلَمُواْ إِذْ يَرَوْنَ الْعَذَابَ أَنَّ الْقُوَّةَ لِلَّهِ جَمِيعًا وَأَنَّ اللَّهَ شَدِيدُ الْعَذَابِ (165) إِذْ تَبَرَّأَ الَّذِينَ اتُّبِعُواْ مِنَ الَّذِينَ اتَّبَعُواْ وَرَأَوُاْ الْعَذَابَ وَتَقَطَّعَتْ بِهِمُ الأَسْبَابُ (166) وَقَالَ الَّذِينَ اتَّبَعُواْ لَوْ أَنَّ لَنَا كَرَّةً فَنَتَبَرَّأَ مِنْهُمْ كَمَا تَبَرَّؤُواْ مِنَّا كَذَلِكَ يُرِيهِمُ اللَّهُ أَعْمَالَهُمْ حَسَرَاتٍ عَلَيْهِمْ وَمَا هُم بِخَارِجِينَ مِنَ النَّارِ (167)

بتفكرني أوي الآيات دي بالممثلين والمغنيين "إياهم" اللي ليهم "أتباع" بالهبل.. كان فيه واحد بيحكيلي من فترة -ولا إيمايل جالي باين- عن حفلة الفنان فلان الفلاني اللي حضرها بتاع 30 ألف واحد..
يا لهوي.. 30 ألف؟
لأ وإيه.. ويقوللك إن المكان كله كان "يعبق" بدخان الحشيش واخواته !
ده غير طبعًا إنهم كانو بيتعاملو مع الأخ اللي بيغني كإنه نبي مرسل.. يميل شمال يميلو.. يقول كلمة يكرروها.. بيقلدوه تقليد أعمى مقلّدهوش الصحابة للنبي وهو سيد الخلق..
أنا مش زعلانة أوي على الناس اللي بتروّج للفساد دي قد مانا زعلانة على -سوري في الكلمة- الغنم اللي بيمشو وراهم.. موقفها هيبقى إيه دي لما ربنا يسألها انتي ليه كنتي بتلبسي كذا وبتعملي كذا فتقولله: عشان بقلّد الستار الفلانية ؟ موقفه هيبقى إيه ده لما ربنا يسأله انتا إيه مبررك في إنك تجرب تشرب الحاجة الفلانية فيقولله: عشان سمعت إنه جامد فحت والستار الفلاني جربه..؟
* * *
يَسْأَلُونَكَ عَنِ الأهِلَّةِ قُلْ هِيَ مَوَاقِيتُ لِلنَّاسِ وَالْحَجِّ وَلَيْسَ الْبِرُّ بِأَنْ تَأْتُوْا الْبُيُوتَ مِن ظُهُورِهَا وَلَكِنَّ الْبِرَّ مَنِ اتَّقَى وَأْتُواْ الْبُيُوتَ مِنْ أَبْوَابِهَا وَاتَّقُواْ اللَّهَ لَعَلَّكُمْ تُفْلِحُونَ (189)

الآية دي قصتها بتفكرني بالواقع المصري أوي..
يقوللك إن العرب زمان أيام الجاهلية (اللي ساكنين في المدينة تحديدًا) كانوا لما يرجعوا من الحج -كانو بيحجّو برضه بس مش زيّنا- يدخلو بيوتهم من ورا مش من قدام !
ليه يا حاج ؟ أهه بر وكدة !
فالإسلام لما جه قاللك لأ.. مش هو ده البر.. البر إنك تخاف ربنا.. وإنك تعمل الحاجات اللي هو قاللك إنها تقربك منه.. يعني تعالى نرجع كدة للربع اللي وراه.. هنلاقي ربنا بيقوللك عن البر:
لَّيْسَ الْبِرَّ أَن تُوَلُّواْ وُجُوهَكُمْ قِبَلَ الْمَشْرِقِ وَالْمَغْرِبِ وَلَكِنَّ الْبِرَّ مَنْ آمَنَ بِاللَّهِ وَالْيَوْمِ الآخِرِ وَالْمَلائِكَةِ وَالْكِتَابِ وَالنَّبِيِّينَ وَآتَى الْمَالَ عَلَى حُبِّهِ ذَوِي الْقُرْبَى وَالْيَتَامَى وَالْمَسَاكِينَ وَابْنَ السَّبِيلِ وَالسَّائِلِينَ وَفِي الرِّقَابِ وَأَقَامَ الصَّلاةَ وَآتَى الزَّكَاةَ وَالْمُوفُونَ بِعَهْدِهِمْ إِذَا عَاهَدُواْ وَالصَّابِرِينَ فِي الْبَأْسَاء وَالضَّرَّاء وَحِينَ الْبَأْسِ أُوْلَئِكَ الَّذِينَ صَدَقُوا وَأُولَئِكَ هُمُ الْمُتَّقُونَ (177)
يعني تحس الإسلام راعى أوي حتة إننا في مجتمعاتنا العربية بنعمل حاجات ملهاش علاقة بالدين.. بس مع الوقت الناس بتفتكر إن ده ليه علاقة بالدين فعلاً ويدّو للحاجات اللي بيعملوها شرعية وشهرة على أساس إنها حاجة لربنا يعني..
أقوللك مثال بسيط أوي..
حتى خمسة وخميسة دي..
مفيش أي حاجة دينيًا بتقول إن رقم 5 بيحمي من الحسد ! ومع ذلك فيه فئة كبيرة من الشعب المصري -ولغاية دلوقتي- لازم تقعد تخمّس في وش أي حد بتشك فيه.. ولو خلفو ولد يسمّوه خميس.. ولو اشترو حاجة جديدة لازم يدبحو حاجة ويستخدمو دمها حبر يطبعو بيه على الحاجة الجديدة اللي اشتروها..
الموقف الأخير ده بالذات لسة شايفاه أول امبارح على عربية في المهندسين..!
* * *

وَمِنَ النَّاسِ مَن يُعْجِبُكَ قَوْلُهُ فِي الْحَيَاةِ الدُّنْيَا وَيُشْهِدُ اللَّهَ عَلَى مَا فِي قَلْبِهِ وَهُوَ أَلَدُّ الْخِصَامِ (204)

أعتقد إن الآية دي مش بس كانت بتحذر النبي من الناس اللي كلامها معسول.. لكن بتحذرنا احنا كمان.. مش بس من الناس اللي بوشّين أو بتنافق وبتاع.. لأ.. من الناس اللي بتبان إنها على حق أوي وهما في الحقيقة مش كدة..
هدّيك مثال غريب أوي.. كنت مرة في ندوة عن اللغة العربية (أصلي غاوية الحاجات دي).. ولقيتلك واحد مفترض إنه يعني من كبار رجال اللغة في البلد.. وعمال يزعق ويشتم في حال الشباب اللي مبقوش مهتمين باللغة العربية وبيستعرّو منها وبتاع..
طبعًا كان بيقول الكلام ده بالفصحى المفروض.. وكان فيه في كلامه أغلاط ! طب سيبك من الأغلاط اللي في كلامه ونقول إنه كان متحمس وبتاع.. طيب فين بقى اللي عمله ؟ فين مساعدته للشباب دول على إنهم يرجعو يحبو لغتهم تاني ؟ هو ده التمثيل المشرف للغة العربية اللي عايز الناس تحبها وتتكلمها ؟
مش عارفة.. بس بحسّ أحيانًا إن فيه ناس بتتبنى قضايا معينة عشان تهاجم ناس مش عشان مؤمنة بالقضية دي.. يعني حسيت الراجل ده بيكره الشباب أكتر ما بيحب اللغة العربية !

* * *

حَافِظُواْ عَلَى الصَّلَوَاتِ وَالصَّلاةِ الْوُسْطَى وَقُومُواْ لِلَّهِ قَانِتِينَ (238)

دي بقى كانت أكتر آية بستغربلها في الجزء كله.. مش عشان هي ذاتها.. عشان مكانها ! يعني لو قريت في المصحف هتلاقيها جت فجأة وسط آيات الجواز الطلاق ! الله ؟ طب إيه علاقة الجواز والطلاق بالصلاة؟!
لغاية ما سمعت مرة من شيخ جميل اسمه ياسين رشدي تعليق عالحتة دي.. قاللك مش يمكن ربنا بينبّهنا لنقطة مهمة جدًا في وسط سرده لحالات الطلاق والتصرف فيها.. إن الكلام ده ممكن نتجنبه بس بـ"حافظوا على الصلوات" ؟! يعني إذا كانت الصلاة هي أول حاجة بتسئل عنها يوم القيامة.. فمن باب أولى إنها تكون من أهم الحاجات اللي تخللي جوازي مستقر.. يمكن يكون "الاستقرار" في الصلاة (يعني مش أصلي فرض وأسيب عشرة) ليه علاقة باستقرار الحياة الزوجية نفسها.. وكنت بسمع -بالصدفة- عمرو خالد من شوية بيتكلم عن نصيحة دهب للي متجوزين من زمان وعايزين يرجعو الحب بينهم وبين بعض وهي "اعبدو ربنا سوا"..
عشان كدة من ضمن الحاجات اللي بدعي بيها إن ربنا يرزقني بعريس مستقر في الصلاة !
منقول
الرجوع الى أعلى الصفحة اذهب الى الأسفل
زائر
زائر



خلى بالك Empty
مُساهمةموضوع: رد: خلى بالك   خلى بالك Emptyالإثنين سبتمبر 17, 2007 1:44 pm

أيوه كده يابلبلة

اكشفي لنا عن الوجه المبدع اللى فيكى

مستنين مواضيع ع نفس النهج

فين الحاجات دى من زمان ؟
الرجوع الى أعلى الصفحة اذهب الى الأسفل
زائر
زائر



خلى بالك Empty
مُساهمةموضوع: رد: خلى بالك   خلى بالك Emptyالإثنين سبتمبر 17, 2007 1:49 pm

وممكن يابلبلة بعد اذنك اقول رأى كمان

فاذكرونى أذكركم
يعنى اذكرونى متذللين أذكركم رافعا قدركم وشانكم امام الملائكة واتباهى بكم
الرجوع الى أعلى الصفحة اذهب الى الأسفل
Islam Hamdi
أزهري متميز
أزهري  متميز
Islam Hamdi

عدد المساهمات : 645
تاريخ التسجيل : 13/08/2007
العمر : 31
الموقع : ميلانوووووو

خلى بالك Empty
مُساهمةموضوع: رد: خلى بالك   خلى بالك Emptyالجمعة سبتمبر 21, 2007 12:33 pm

اية النيو لوك الجديد دة يا بلبلة
بس بجد حلو اوى ربنا يكرمك
ونشوف منك المزيد كمان وكمان
الرجوع الى أعلى الصفحة اذهب الى الأسفل
http://www.way2allah.com/modules.php?name=live
 
خلى بالك
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى جامعة الأزهر :: اسلامنا :: عبادات-
انتقل الى: