يلا ياشباب ويابنات قولو رايكم قول رأيك بجد عايزيين رايكم

السلام عليكم ورحمة الله وبركاته.. أحب أن أشكركم على الموقع الجميل جدا ده، وشكرا على ردودكم واهتمامكم بالقراء.. أنا بنت عندي 24 سنة، انطوائية شوية وماليش خبرة قوي في الحياة. بس الحمد لله على كل حاجة.

المشكلة بدأت لما بدأت أتكلم مع شاب على النت لأن أهلي بره وسايبنّي لوحدي، فقلت أدخل مرة على النت أدردش. واتكلمت مع إنسان بان إنه محترم وكويس وبعدين حكا لي كل حاجة عن نفسه وإنه كان خاطب وساب خطيبته لأنها خانته. وقال لي إنه كان بيشرب كل حاجة وكان بيمشي مع بنات كتير وقال لي كل حاجة عن نفسه وعن عيلته. وبدأ يلمح لي إنه معجب بيّ وبأخلاقي وتديني..

أنا أقنعته إنه يبطل وقال لي إنه الحمد لله بطّل يشرب حاجة خالص، وبقى بيصوم على طول وبيصلي. وقال لي أنتِ السبب في تغيريّ.. بس المشكلة أنا خايفة إنه يكون لسه بيحب يبص لبنات تاني، وأنا حاولت أبعد عنه وقلت له إن احنا مش زي بعض، وإن طباعه غير طباعي وأخلاقه غير أخلاقي. قال لي إنه والله اتغير للأحسن علشاني، وعارف إني البنت المناسبة له..

أنا مش عارفة هو كلامه صح ولاّ غلط. أصدقه ولاّ لأ؟؟ أعمل إيه علشان أعرف هو بقى بجد كويس ولاّ لأ علشان أبعد عنه؛ لأني ماليش خبرة قوي.. أرجوكم ساعدوني.. أنا ماليش أصحاب وماليش حد أسأله.. أرجوكم أفيدوني لأني باثق جدا في آرائكم والسلام عليكم ورحمه الله وبركاته..

وكانت هذه ردود بعض المترددين على الموقع انقلها كما هى
في اختراع اسمة خطوبة ويجي من البيت في تلاكيك واعذار يبقي في رد فعل منك بقطع العلاقة خالص
mahitab

السلام عليكم ورحمة الله وبركاتة لا تعجبي بعلاقات النت فمعظم علاقات النت ليست صادقة فمعظمها مثل بيوت العنكبوت بيوت واهية ضعيفة جدا من أقل شئ تهدم
HAMADA

بصي يا ست الكل...نصيحة من اخ ليكي اوعي في يوم تصدقي اي حاجة اتقالت ليكي من ورا شاشة الكمبيوتر واللي بيدخل بيت من الشباك مستحيل يستريح وهو داخل من الباب لانه اتعود ع الدخول من الشباك ليا واحدة صاحبتي نفس مشكلتك بس للا سف كانت حبته قبل ما تتأكد من كلامه دا وانا شاب واعرف الشباب بيقولوا ايه ع النت صدقيني انا خايف عليكي والله اوعي تصدقي والا هتضيعي وتدمري نفسك ومستقبلك باديكي واللي فيه الخير ليكي يقدمه ربنا.
k70dni_leek

قوليلو لو عايزك بيت اهللك مفتوح غير كدمايلزمكيش وخدى وقتيك كويس واسالو عليه واستخيرى الله فيما لكى فيه الخير وربنا معاكى
dodo88

قال نت قال هههههه اطلبى منة يتقدملك رسمى وانتى هتسمعى احلى حواديت واحلى اعذار . ويمكن يحصل خير ويطلع صادق بس دة بيحصل بنسبة قليلة اوووى بعدها قررى انتى عاوزة اية وماتعلقيش نفسك فى حبال دايبة وانتبهى لمستقبلك
موون شاينى

لو عايزك وشاريكى يتقدملك لو اتحجج بقى يبقى بيتسلى وتبعدى عنة فوراااااااااااا
NONO

حب النت ده كله كدب كله كله انتي ولا عمرك شفتيه واصلا تصدقي ازاي واحد متعاملتيش معاه ولا تعرفي عنه اي حاجه ايه عرفك اذا كان كلامه كدب ولا لأ
هبه

انا عندى فكرة ممكن تدخلى وتكلميه بس بأيميل تانى وشوفى حيقول نفس الكلام اللى قاله لك ولا لأ ومن خلال كلامه حتعرفى اذا كان اتغير فعلا ولا لأ
batotaaaaaaa

لو كنتى بتحبيه وهوه بيحبك اطلبى منه يتقدملك رسمى وصلى صلاة استخاره وان شاء الله ربنا هيبينلك اذا كان ينفعك او لا
OWEN

حبيبتى تضمنى منين صحة هذه المعلومات التى لديك مش شرط يكون بيقول الحقيقة اسأليه من الاخر هو عايز منك ايه لو عايز جواز يتفضل يكلم اهلك واهلك يسألوا عليه براحتهم غير كده مالوش عندك حاجة وياريت الكلام يبقى فى حدود او الغيه احسن مالوش لازمة تعيشى فى الوهم اشغلى وقت فراغك بما يفيد وفي مواقع كتير ع النت مفيدة او اقرأي قران مارسى هواياتك واخرجى من سجن الشات اللى حبستى نفسك فيه
منى ياسين

ما بنى على باطل فهو باطل
شات بين ولد وبنت لا يجوز شرعا الموضوع من اساسه غلط
كما انه من الصعب جدا انها تثق فى انسان لا تراها ولم يتعرض لمواقف لتفهمه جيدا
الشات اعتقد انه ممكن يكون صوره عن الشخص الى بكلمه لكنه مش اساس اقدر ابنى عليه حياة كامله

انا انصحها بالابتعاد عن هذا الشاب وان تعود الى الله وتستغفر وتعلم ان من ترك شئ لله عوضه الله خيرا منه

انا نفسى افهم حبيته من مجرد كلام
سبحان الله
وبعدين اساسا مش هو ده المجال الى يكون صالح للارتباط
هيا ايه ياكدلها حقيقه كلامه
وحقيقه شخصيته اساسا
وهو سورى يعنى ايه يضمنله انها مبتعملش شات مع حد تانى

بصراحه الموضوع من الاول مينفعش
حتى لو كان بيحبها وهيا بتحبه فعلا
للان زى ما البتول قالت
ما بنى على باطل فهو بااااااااااااااااطل

وتعارفهم من الاول مكانش صح
هيا تستعذ بالله وتقطع علاقتها بعالم الشات ده اساسا
وربنا يهديها ويهدينا ويرزقها بالزوج الصالح وتكون ذريه
صالحه

انا اعرف ناس اتعرضت للموضوع دة وايضا طلب منها انو يجيى للبيت يتقدم بس هية اخذت رئ ابن عمها وقولها لاء
عارفين لية
لان الى عايز يتقدم دة مش هيرضى دة لاختة
وكمان لان موضوع الارتباط دة شئ ينى علية مستقبل
ومش معقول يكون من شئ زى النت
وانا اقولها فور تسيه حتى لو عايز يجى يتقدم

بسم الله الرحمن الرحيم

سواء كان نت او غير نت فهو "حرام حرام حرام"
وان كان من حب لبشر بعد النبى عليه الصلاة والسلام فهو للزوجة

واى شىء خارج المجال ده فهو بعيدا تماما عن دائرة الاسلام وعن تعاليمه
الموضوع مش عاوز رأى ولا افتاء

انا نفسى افهم حبيته من مجرد كلام
سبحان الله من الممكن انه يحصل ياساره شكرا على ردك واهتمامك ووجودك صفا كلامك منطقى وعقلانى
محمود جزاك الله خيرا على ردك

زائر

بجد انا مش عارفة معنى الحب ايه من النت بس اظن انه مش حقيقة لانه ازاى اتين مش يعرفوا بعض ولا صفات بعض
يكونوا كدا
بجد مفيش حب من النت

الموضوع من بدايته غلط طبعا
يعنى ايه تحب على النت
ازاى نقدر اننا نبنى بيت وحياه على ارض الواقع واحنا متاكدين ان الاساس كان مجرد كلام يعنى وهم مينفعش نقوم عليه البيت
وبعدين مش اى حد نكلمه نعجب بيه ومش اى حد يكلمنا بادب واسطوانه انا اتغيرت عشانك يبقى لازم نكمل معاه
لا طبعا الكلام ده مش صح
النت ده الاستفاده منه اسمى من اننا ندخل شات ونضيع وقتنا فى حاجات تافهة بجد
شكرا يا د/هانى على الموضوع

زائر

والله يا اخوانى لازم نفرق تماااااااااما بين الشات وبين النت بصفه عامه

يعنى انا اوافق اخوانى فى مسأله الشات مائه فى المائه.انما فى حاجات فى

النت ممكن ننظر فيها..ينى مثلا موقع لشيخ فاضل ومعروف ووجدت اخت

مؤمنه واعجبت بردودها ومواضيعها انا اعلم ان ده مش كفيل انى اعرف شخصيتها لكن.ايه المانع انى احاول اعرف وده ملوش الا طريق واحد بس

انى اعرف عنوان بيتها وهناك اعرف شخصيتها..وفعلا فى مواقع ومنتديات

ماشاء الله ماشاء الله تبارك الخالق فى اخوات فيه ربنا يزيدهم ويحفظهم.

ايه المانع انى اطلب بكل ادب عنوان بيتها واستخير الله فى امرها...

ويكون محل زواج وده يرجع للمكان اللى عرفتها منه.اولا اما مسأله الشات

فدى مرفوضه من البدايه..وهذا رأى لعل احدكم يوافقنى لا انسى ان اشكر كاتب الموضوع اخويا هانى

بارك الله لك