منتدى جامعة الأزهر
هذه الرسالة تفيد بأنك غير مسجل بالمنتدى تفضل بالدخول على اشتراكك ان كنت عضو لدينا او قم بالنقر على زر التسجيل لتصبح عضو معنا
منتدى جامعة الأزهر
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.


منتدى خاص بجامعة الازهر للتعليم والدراسه من خلاله
 
الرئيسيةالتسجيلدخول

 

 الطريق إلى قطر

اذهب الى الأسفل 
كاتب الموضوعرسالة
د.هانى
أزهري فعال جدا
أزهري  فعال جدا


عدد المساهمات : 255
تاريخ التسجيل : 09/08/2007
العمر : 32
الموقع : www.raddadi.com

الطريق إلى قطر Empty
مُساهمةموضوع: الطريق إلى قطر   الطريق إلى قطر Emptyالسبت فبراير 09, 2008 10:34 am

أشرف توفيق



من سنتين كده اتصلوا بالعبد لله عشان أروح أمثـِّل مصر في مهرجان ثقافي في قطر.. وبما إن أخوكم أعظم معلوماته عن الطيران إن أول واحد اتهبل في دماغه وطار كان "عباس بن فرناس" وبحمد الله اتقطمت جدور رقبته .. فقعدت أنا وصاحبي اللي هييجي معايا نتفق..

قال لي يا عم أنا هاركب جنب الشباك عشان بادوخ ولو حبيت -لا مؤاخذة- أرجَّع هافتح الشباك.. وأنا أقول له يا غبي ما ينفعش.. الترجيع أكيد له أماكن محددة في الطيارة.. الناس بتروح فيها ترجَّع مع بعض في اللذيذ يعني.. أنا بقى هأقعد ورا عشان أبقى جنب الشنط بتاعتنا في شنطة الطيارة باعتبارها بيجو 7 نفر!!

وقعدت أنصحه عشان مايطلـَّعش إيده من شباك الطيارة عشان الطيارات المقابلة وكأننا راكبين توك توك في الفضاء!!

دخلنا المطار.. وشفت لأول مرة طيارة يا جدعان.. أيوه من اللي لها جناحين دي.. وكبيرة جدا ونضيفة جدا.. أنا شفت الطيارة من هنا وقعدت أقول للمشرف يا أستاذ ما ينفعش آخد فلوس السفر وأمثـِّل مصر هنا؟؟ طب ممكن أمثـِّل مصر وسوريا والأردن من هنا بس ما أروحش؟؟

المهم دخلت الطيارة وقعدت على الكرسي بتاعي وأنا أقول لنفسي.. كفاية عليك 25 سنة يا واد يا "أشرف".. أنت هتنهب من الدنيا؟؟ أنت كده ميت وكده ميت.. وكفاية إنك هتموت فووووق!! يعني هو الموت تحت رجس من عمل الشيطان؟؟!!

طبعا قالوا لي قبل ما تركب كـُل لِبان كتير عشان الضغط على ودانك.. واشتريت خمسين سَهْم في شركة هارتي وشكلتس في البورصة.. إن الضغط يقل.. أبداً.. وقعدوا يعرفونا لما نغرق هنعمل إيه ولما نتحرق هنعمل إيه ولما يطلع روح أهلنا هنعمل إيه.. المضيفة فكـَّرِتني بالإمام اللي بيوصف للناس صلاة الجنازة قبل ما يصلوا الجنازة على حد!!

ووصلنا هناك أخيرا بعد جهد جهيد وبعد ما بدأت أفكر إني ممكن آخد الجنسية القطرية مش عشان أي حاجة لا سمح الله.. بس عشان مارجعش تاني في الطيارة!!

وبدأنا نعيش الأيام الأولى لحد ما تيجي الندوة بتاعتي.

وأنا في الندوة أقول قصيدة ناقص دبدوب اللي فيها إن حبيبتي خدت مني دبدوب.. لقيت واحد جاي يسلِّم عليّ بعد الندوة.. وطبعا زي حال أي واحد متواضع مغرور زيي كنت باطنش تلاتة وأسلم على واحد!! وده كان حظه إني بحمد الله طنشته.. يعني ازيك.. أهلا وسهلا.. اتفضل.. الله يكرمك.. وخلاص..

لقيت واحد بيشدني ويقول لي: أنت ماتعرف مين هذا؟؟ قلت له: إياكش أعدمك ما أعرف.. قال لي: ده قاضي البلاد.. نعم؟؟؟ ده؟؟؟؟ قاضي البلاد؟؟؟؟ ده عنده تلاتين سنة.. مش القاضي ده اللي عندنا بييجي في التليفزيون وهو لابس شريطة حمرا زي المحكوم عليهم بالإعدام وبيبقى دايما عنده مية وخمسين سنة؟؟ ما هو صحيح قطر كلها قد ميدان -الله يرحمه- رمسيس هيبقى القاضي بتاعها ازاي يعني بالعقل؟؟

المهم قال لي يا أخي والله قصايدك جميلة.. بس إيش هادا الدبدوب؟؟ قعدت أشرح له الدبدوب في المعجم وباب الدال فصل الباء وما يثلثهما الدوب.. قال لي إيوه إيوه احنا بنعرفه.. بس أنا أسأل على القصيدة وهديتك للمحبوبة.. الواحد مننا هون في قطر ما بيعطي لحبيبته دليل المحبة ها الدبدوب... هو بيعطيها عقد ألماس.. عربية شيروكي!!

نعممممم؟؟؟ أنت عايز حبيبتي تاخد مني شيروكي وأعمل فيها قصيدة؟؟؟ ده أنا أجيب لها سندويتش ديناميت وأفجرها.. ده أنا أقطعها بأمواس وأرش عليها سبرتو.. عشان يعمل طششش.. أنا أجيب لحبيبتي عقد ألماس؟؟ وماله الخلخال؟؟ وحش لا سمح الله؟؟


المهم قضينا الفترة بتاعتنا وفوجئت مرة تانية بمنظر الطيارة واحنا راجعين.. بس كانت مختلفة يا جدعان.. الكراسي متقطعة وكمان مكتوب عليها زي الأتوبيسات، للذكرى الخالدة "عباس" و"أم السعد"، والكرسي معووج.. يا جماعة دي ما تنفعش تمشي على الأرض.. دي هتطير ازاي؟؟

الخوف طبعا كان أكتر مائة مرة.. قعدت لقيت جنبي واحد شاب من أسوان من فرقة الفنون الشعبية.. الواد لقيته مغمض عنيه وبيترعش ويقول لا لا لا وقـَّفها وقـَّفها.. عبيط ده ولاّ إيه؟؟ الطيارة لسه ما اتحركتش أساسا.. كل ما الطيارة تزن شوية وهي لسه ع الأرض ألقى الولد اتشعلق في القميص أكتر وكأني أنا اللي سايق يعني.. أول ما المروحة اشتغلت لقيت صاحبكم مسك في القميص بتاعي وقاعد يتشنج:

وقـَّفها مش عايز أموت.. لا لا لا لا لا..

يادي النيلة ع السفر وع الركوبة المهببة وع المكان المعفن كمان!! يا عم سيب القميص أنا مش ناقص.. وطبعا عرق الشهامة اللي مالوش لازمة في وقتها خلاني فضلت أهدِّيه يا عم العمر واحد والرب واحد وأنا أساسا عايز أعيَّط لوحدي..
أول ما قالوا فكوا الأحزمة رجعت آخر كرسي في الطيارة عشان أبعد عن الأخ اللي كان لسه بيتشنج وبيقول لي وقـَّف الطيارة عشان خاطري.. كنت عايز أقنعه إن مفيش حد يعرف يوقَّف طيَّارات ويسوقها ويجيد قيادة جميع المركبات من الغواصات حتى التوك توك غير "أدهم صبري"!!

الرجوع الى أعلى الصفحة اذهب الى الأسفل
د.هانى
أزهري فعال جدا
أزهري  فعال جدا


عدد المساهمات : 255
تاريخ التسجيل : 09/08/2007
العمر : 32
الموقع : www.raddadi.com

الطريق إلى قطر Empty
مُساهمةموضوع: رد: الطريق إلى قطر   الطريق إلى قطر Emptyالأحد فبراير 10, 2008 1:42 pm

يمكن تيجى سفريه لاايطاليا ولا حاجه بلاش قطر بس موضوع دمه خفيف
الرجوع الى أعلى الصفحة اذهب الى الأسفل
amina
أزهري فعال جدا
أزهري  فعال جدا
amina

عدد المساهمات : 319
تاريخ التسجيل : 08/08/2007
العمر : 30
الموقع : www.azhar.forummaroc.net

الطريق إلى قطر Empty
مُساهمةموضوع: رد: الطريق إلى قطر   الطريق إلى قطر Emptyالأحد فبراير 10, 2008 5:33 pm

اه والله يا دكتور هانى موضوع جميل جدا

خليتنى والله ضحكت

متشكرين يا دكتووووور
الرجوع الى أعلى الصفحة اذهب الى الأسفل
toto89
مشرف المنتدى العام
مشرف المنتدى العام
toto89

عدد المساهمات : 668
تاريخ التسجيل : 28/02/2008
العمر : 31

الطريق إلى قطر Empty
مُساهمةموضوع: رد: الطريق إلى قطر   الطريق إلى قطر Emptyالأربعاء مارس 12, 2008 10:51 pm

موضوع عسل خالص
شكرا دكتور هانى

_________________
لعبه نتوقع مين بعد مين
توقع يا حلو



الأن منتدى صناع الحياة عندنا
شرفنا بزيارتك وابداعاتك




الطريق إلى قطر 652382262



لا تحزن لأن الحزن يزعجك من الماضي ، ويخوفك من المستقبل ، ويذهب عليك يومك
الرجوع الى أعلى الصفحة اذهب الى الأسفل
 
الطريق إلى قطر
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى جامعة الأزهر :: المنتدى العام :: فضفضه-
انتقل الى: