بسم الله أبدأ
السلام عليكم ورحمة الله وبركاته
كيف حالكم إخوتى (إخوانى وأخواتى) فى الله.
يا رب تكونوا لسه فاكرين سيف الإسلام........ ويا رب تكونوا عاوزين تفتكروه.... ويا رب ما تكونوش زهقانين منه.
والحمد لله أنا خلصت امتحانات الثانوية... والحمد لله... أنا فرحان مش لأن السنة خلصت وارتحت من المذاكرة.... لا بالعكس دا أنا نفسى أذاكر....بس فرحان إن الشد العصبى اللى الواحد كان فيه خلص.
والحمد لله كل الامتحانات عدت بخير جداً والحمد لله ربنا هدانى إنى ما أغشش خالص. بس تعرفوا إنى احتجت الغش وقت ايه... يوم امتحان الأدب والنصوص....... والله كنت بأبكى داخل اللجنة....
والمراقب يقلى : فيه ايه؟
سيف الإسلام : بالله عليك يا أستاذ تسيبنى فى حالى. أنا لسه معايا سؤال كامل.
المراقب: طب يا ابنى غشوا من زمايلك... طب أجبلك الكتاب لو انت مش متأكد من زمايلك.
سيف الإسلام: يا أستاذ أنا مش غاشه من حد.
دخل رئيس اللجان : محمد عامل ايه؟
لقانى بأبكى.
جه جرى: ايه يا محمد فيه ايه؟
المراقب: لأ فى سؤال مش عارف يحله.
رئيس اللجان: دا محمد ده محترم جداً يا أستاذ وما شاء الله عليه أنا بجيله كل يوم أتفرج على الإجابات وأقعد جنبه. حتى أنا دلوقتى كنت ناوى آجى أقعد جنبه. وهعقد جنبه وهمليه السؤال بعد إذنك يا أستاذ.
المراقب: اتفضل.
رئيس اللجان: سؤال ايه اللى أنت مش عارفه؟
سيف الإسلام: لأ أنا خلصت يا أستاذ.
رئيس اللجان: أمال بتعيط ليه؟
سيف الإسلام: لأ مفيش حاجة يا أستاذ.
رئيس اللجان: يا ابنى فيه ايه؟
سيف الإسلام: مفيش حاجة أنا عاوز أسلم وأطلع.
رئيس اللجان: براحتك.
وخرج سيف الإسلام بدون ما يحل نقطتين فى الامتحان. وا أسفاه. طلعت تهزأت جداً بره من الولاد زمايلى.
يوميها كان يوم ، الحمد لله إنه فات. حتى حرقت الخط بتاع الموبايل يومها ما أنا كنت مضايق وماسك الموبايل عمال أضغط على اى حاجة لقيته مره واحدة بيقلى تم رفض البطاقة. اتصلت بالشركة قالولى انت عملت رقم سرى ودخلته عشر مرات غلط. بس الحمد لله والشكر له.
نفسى أعرف من حضراتكم رأيكم ايه؟ يا ترى أنا صح ولا هم اللى صح؟
أنا شفت ناس ملتزمة جداً وقالولى: لازم فى الامتحانات تتخلى عن القيم والمبادئ نهائياً لأن دولتك ماشية كده كلها. ولازم تغش.
واللى يقلى : يا عم غش وبعد كده ابقا استغفر وتوب.
تعرفوا ان لحظة صعبة جداً لما يبقى فى صراع بين النفس والدين. حاجة صعبة جداً.
والامتحانات الباقية الحمد لله عدت بخير والحمد لله على ذلك. الحمد لله
وأنا آسف إن كنت طولت عليكم فى الموضوع. بس أنا بعتبركم إخوتى. وبعدين أنا ما بلقيش حد أكلمه ولا أفضفض معاه. فقلت أتكلم بقا فى فضفضة مع إخوتى.
ويا رب يكون كل أعضاء المنتدى اللى كانوا فى الثانوية عدت امتحاناتهم بخير وياريت يطمنونى ويقولوا رأيهم فى الامتحانات.
بوجه عام فى معهدنا: كانوا يعانون من التفاضل والتكامل ومن الميكانيكا ومن الفيزياء ومن الكيمياء ومن الصرف وخاصة كانوا يعانون أشد المعاناة فى يوم الخاتمة يوم الجبر والهندسة الفراغية. كانوا يعانون من الجبر.
لكن بصفة خاصة: أنا كنت أعانى من يوم الأدب والنصوص.
وأعانى من طول امتحان الفيزياء والأحياء والكيمياء ولكنهم أسهل ما يكون.
وهذا الموضوع موجود فى المنتدى الجديد
والسلام عليكم ورحمة الله وبركاته