ياسيدي مش عايز اكلمك ومش عايزاك تشكرني
--------------------------------------------------------------------------------
(تيت تت-تيت تت-تيت تت) هييه هييه جالي رساله مين ده اللي معبرني وفاكرني ده انا بموت في الرسايل باحس انها مفاجات صغيره اجري بسرعه على التليفون افتح المسج وبكل خيبة امل الاقيها كلمني شكرا من اختي الصغيره اقول خير يارب في حاجه ولا ايه اتصل بيها ها يابنتي في ايه خير مافيش اصل ماعنديش رصيد قلت ابعتهالك بدل الرنات
في المساء (تيت تتت_تيت تت) هييه رساله تاني اما اشوف المره دي ايه كلمني شكرا تاني من اخويا انا باقلق جدا من كلمني شكرا اللي بتيجي من اخواتي اتصل جري الو ايه يابني انت كويس وماما كويسه وبابا كويس في حاجه؟
هو:لا اصلنا قاعدين على النت كلمينا دلوقتي
تاني يوم
(تيت تت-تيت تت) ياترى الرساله دي منين هي كمان بصيت على الاسم ياه صاحبتي الانتيم والله فيها الخير
ايه ده كلمني شكرا برضه بس انا لسه مكلماها امبارح وسألتها على نتيجتها قالت لسه مابانتش قلتلها ابقي (اتصلي) طمنيني ياترى باعته رساله ليه؟
اتصلت بيها ماينفعش اتجاهلها
هي :الو ياحبيبتي انا نجحت قلت افرحك قلتلها مبروك ياستي
وقلت في بالي:امال ماتصلتيش انتي ليه
شويه وجت كمان رساله من اخويا التاني كلمني شكرا ماكنتش موجوده جوزي اتصل لقى خالتو اللي في محافظه بعيده بترد عليه اخويا كان عندها فقال يخدمها ويخلينا نكلمها المهم بعد السلامات والتحيات هي واولادها قفلت
شويه وجت رساله كمان من نفس الرقم كلمني شكرا كنت انا موجوده ورديت خالتو تاني
هي: ايوه ياحبيبتي واحشاني كلمت جوزك قلت اما اكلمك كمان شويه تكوني جيتي وادتني ولادها برضه(ايه الناس دي بقى لما اوحشهم يبعتولي اكلمهم) عموما مش مشكله اخواتي وخالتو دول حبايب قلبي لو حتى هاخلص رصيدي عليهم انا باقلق بس لما يبعتوا الرساله دي
وتتواللى الرسائل واحد قريبنا يبعت كلمني شكرا لجوزي نتصل بيه يقول انا كنت عايز الخدمه الفلانيه ياه يعني حتى اللي عايز خدمه مش بيتصل
واخر حاجه رساله كلمني شكرا من رقم غريب اتصلت فورا قلت جايز حد اعرفه وفي حاجه ضروري
الو مين معايا
انتي اللي طلبتي
مين حضرتك
انتي اللي مين
طاخ قفلت الخط ناقصه المعاكسات كمان ده انا رصيدي اتهرى
ياعالم الرساله دي للضروره للطوارئ لومش معاك رصيد وفي حاجه ماتستناش
مش الواحد يقعد يبعت رسايل لاي تليفون واللي يتصل بيه يقعد يشتغله يارب يلغو الخدمه دي الرساله زمان كانت معبره وليها قيمه حقيقيه فيها كلمه حلوه او دعاء اوابتسامه مش كلمني شكرا طيب ياسيدي مش عايزه اكلمك ومش عايزه شكرانيه
الثلاثاء يناير 15, 2008 9:59 pm