تخيل انك رئيس دوله>>>

يا عم انت حتدفع حاجة من جيبك ؟
الحلم ده على حسابي
غمض عينيك شوية واحلم انك بقيت رئيس البلاد
متقولش ازاي؟.. مش مهم
زورت الانتخابات.. او قلت للناس انتخبوني احسن ارمي نفسي من فوق البرج فصعبت عليهم قاموا انتخبوك.. او يكون لك واحد صاحبك امريكاوي بتكلمه على الياهوو وقال لبوش انك ولد مجدع ورجولة وكفاءة وانك من بتوع العولمة والعوالم والنظام العالمي الجديد لنج.. ومش من اللي بيصلوا الفجر جماعة.. فوافق بوش انك تقعد على... الكرسي
المهم انك بقيت دلوقتي رئيس البلاد
*********
مين قدك يا عم؟
حتاكل طعمية مقلية بزيت فرنساوي وربنا ح يتوب عليك من طعمية ابو هويدا المقليّة بزيت العربيات
وحتتعالج من انيميا الفول.. الفول الجديد بقه يا عم من غير سوس
وابقي قابلني لو لقيت اي مسمار في العيش.. حتاكل عيش من ابو الرغيف بربع جنيه.. سخن وطازة وطري.. تخيل.. طري مش زي العيش اللي انت كنت بتاكله وانت بتشرب كوباية ميه ورا كل لقمة علشان تنزل
لا لا.. العيش ابو شلن ده اللي انت كنت بتجيبه من الفرن وعقبال متوصل بيه البيت يسلجم ويقفع ويعرقص.. وتعاقب عليه دولياً لأنه اصبح من اسلحة الدمار الشامل.. لا انسى الكلام ده
الاوضاع حتتغير خالص ياعم.. دا انت ربنا حيكرمك خالص والله العظيم
طب بص دي.. حتاكل لحمة.. متبرّقش أوي كده.. مش عارف يعني ايه لحمة؟
( همّ حيقولولك )
وبعدين انت مش كنت بتسمع وانت قاعد على القهوة وحاطط رجل على رجل وصباعك طالع من الجزمة انهم حيستوردوا حاجة كده من السودان واثيوبيا
آه فاكر ؟
أهي هي دي اللحمة
لا لا مش اللي انت كنت بتاكلها في العيد ، بتاعت العيد دي اسمها كرشة.. متفضحناش بقه الله يسترك
*********
وحيبقى فيه كنكاكي.. متسألش.. دي فراخ.. يعني حتودع عم لطفي الفرارجي اللي كان بيعين لك رجلين الفراخ وانت كنت بتقول له عشان الكلب.. وكان ساعات يفوّتلك حتتين قنصة على حتتين كبدة من بتوع الزباين اللي بيستحموا بصابون اجنبي
وحتشرب السيجارة كلها مرة واحدة.. يعني مفيش تخميس
وبعدين دي سجاير ستراكي سترايك من بتاعت الست ماري منيب.. جو تاني
بس لما يخدوك علشان تحلف اليمين
ياعم دا غير يمين الطلاق اللي انت مصدره في كل حدوتة تحكيها
اصحي معايا الله ينجيك
لما تروح تحلف اليمين اوعى تروح بالبدلة بتاعت جوازك.. انت عارف.. دي بقت مكيفة الهواء من كل ناحية.. العربي جوز ام بطة عنده بدلة اخوه باعتهاله من بلاد بره ابقى استلفها منه وإقضي مصلحتك وبعدين رجعهاله.. ماهي الجيران لبعضها امال ايه
وحياتك كمان يا شيخ متروح بالجزمة بتاعتك.. عشان خاطري ابقى اشتريلك جوز جزمة من بيع المصنوعات دي رخيصة هناك.. لأن الحدوة اللي انت مركّبها في كعب الجزمة بتعمل صوت قلق برضه.. وبعدين ممكن الجهاز يصفر عليك تبقى حكاية.. فاهم ؟
اول يوم بس وبعدين همّا بعد كده حيتصرّفولك في جوزين جزم مستوردين عشان تقابل بيهم اصحابك بتوع الدول التانية
*********
وحتنام على سرير عليه مراتب.. المراتب دي بقه جواها قطن
ايوة قطن.. والله العظيم قطن.. ايوه تمام زي القطن اللي انت جبته من الاجزخانة للوله حودة ابنك لما الواد شحته ابن ام بيسة لزقه بالطوبة في نافوخه فتحهاله
وجريت بيه على المستشفى قالولك هات لنا قطن وشاش وميكروكروم وصبغة يود وبلاستر وسرنجة وحقنة تيتانوس وكيس دم واقطع تذكرة بخمسة جنيه من شباك العلاج المجاني
ايوه هو ده القطن.. فهمت ؟
حتحلم احلام نضيفة على السرير دا يا عم الحاج
افرد طولك.. متخافش رجليك مش حتطلع برة الاوضة.. انت مش في بيتكم دلوقتي.. افرد افرد
غمّض عينيك كده
غمّض
*********
ايه؟.. انت نمت ؟
اصحى يا عم.. اصحى.. الباب بيخبط
الحق.. موظفين الكهربا على الباب
الحق دول جايين يشيلوا العداد علشان بقالك 3 شهور مدفعتش الفاتورة
*********
منقول من شهر العتق.. بمجموعة اليمامة البريدية

زائر

هو الريس بيفطر طعمية وفول بردك
ههههههههههههههههه
دة بيفطر حاجات مش بتجى فى الاكل اصلا
المهم انى رئيس جمهورية نفسى والعزاء قاصر على البنات فقط

هههههههههههههههههههه

شكرا يا حلم

بس بصراحه انا اتأثرت عشان الراجل اللى فى القصه دى

لان فعلا فيه ناس للأسف كده و اكتر من كده

يلا هنعمل ايه ربنا يحنن الناس اصحاب الاموال على الفقراء و المحتاجين يا رب

شكرا ليكى يا حلم

محمد انت الصورة الرمزيه اللى انت حاططهل دى ما ينفعش تحطها كده

دى بنت يا محمد و احنا على الانترنيت مش بينك و بين واحد ولا اتنين

و بعدين البنت دى لو تعرفها المفروض ما تنشرش صورتها و لو ما تعرفهاش

ما تنشرهاش برضه اعتبرها زى اختك

و بعدين دى مش صغيره يا محمد عشان صورتها تتحط ببساطه كده!!!!

معليش يا محمد انا بكلمك بصراحه انا ما اقبلش حد يعمل معايا كده

فبرضه ما اقبلهاش على اى بنت

الا بقى اذا كانت هى راضيه فهى حره

شكرا ليكى يا حلم تانى

شكرا على مرورك يا نور انتى وعمرو خالد
ورائي زي رائيك بس هحتفظ بيه لنفسي عشان هو بيزعل من كلامى وبيعتبرنى عدوته تحياتى ليكوا ولكل من دخل موضوعى ومردش

ايه يا عم انت متعرفش ان الناس بطلت تحلم

زائر

واللة ولا مفيش حاجة انتى لسة مش عارفة مين محمد ومع ذلك الصورة هاشلها واسف

انت ناسي ان انا حلم
تحياتى على مروركم

ايه يا محمد خدت الموضوع بحساسيه ليه

انا كلمتك بصراحه و جبت كل الاحتمالات فى ردى مش اكتر و الله

ولا اقصد اضايقك خالص و الله

ده انا قولتهالك بسلامة نيه خاااااااالص بجد

و بعدين انا زعلت عشانها كمان لانها زى اختى

و انا اسفه يا محمد بس و الله انا ما قصدتش اتهمك بحاجه خالص بجد

زائر

فاااااااااااااكره لما قلت لك انتى أسم على مسمى يا حلم..

وبكررها.انتى..حـ..لـ..م.

هنتوقع ايه بقى من مواضيعك..ههههههههههههههه

شكرا يا فاندم على الموضوع اللى جذبنى وشدنى ..وبشكرك على الاسلوب

ههههههههههههههههههههههههه

شكرا ياحلم الموضوع ممتع والله

شكرا ليكوا على اهتمامكوا بمواضيعي
واتمنى انى ارفع مواضيع تانيه باذن الله

زائر

هازعل من اية يا هند انتى اختى
واللة ما زعلان وعادى يا ستى
امتحاناتك امتى
شدى حيلك

امتحناتى كمان اسبوعين

قبل العيد الشفوى

و التحريرى 5 -1

ربنا معانا كلنا

و معاك انت كمان يا محمد

زائر

اوك
انا لسة واللة مش عارف امتحانتى امتى
لانى سمعت ان مصر كلها 5_1 وتفهنا 25_12
اللة اعلم يلا كلها متحانات فى النهاية وكل سنة وانتى طيبة

جميل اوى يا حلم وفعلا الناس دلوقتى بطلت تحلم خالص على راى الكنج
وميرسيه على موضوع يا حلم