واحده صاحبتى من زمااااان من حوالى 4 او 5 سنين كده
كانت مشتركه فى منتدى و بتكتب فيه شعر
كانت بجد شعرها رااااااااائع كان عندها 15 سنه بس
من ضمن الاشعار اللى بهرتنى بجد
و اللى خلتنى اقرب منها اكتر الشعر اللى هنقلهولكم
و اللى بجد اول كا كتبته نقلته و احتفظت بيه من ساعتها و دايما بفتكره
الشعر بيحكى عن بنت عاكسها شاب فى الشارع شوفوا بقى ايه اللى حصل...
قلبى صغنن زى النونو
و عشان كده انا خايفه عليه
واعده ابويا بأنى اصونه
علشان حد ما يلعب بيه
قلبى برىء جدا و ضعيف
ولا عارف ابيض من اسود
و ما لوش دعوه بشاب ظريف
ماشى فى حاله عمره ما يحود
وسط الشارع هادى و عاقل
ولا بيبص يمين حواليه
ولا ملفوت للناس ولا سامع
لو بينادوا و يجروا عليه
مظبوط دايما كده و رزين
ولا بيهمه فى يوم المظهر
ما اتشيكش بقاله سنين
عمره ما كان يمشى و يتمختر
و فى يوم و انا فى طريقى و ماشيه
بصلى واحد شكله جنان
حدف البسمه فى لحظه عليّا
رديتهالو بنظره كمان
قلبى النايم رفرف فجأة
و استعجبت ده مش من طبعه
مش من عادته يبص برقه
اعمل ايه د انا خايفه لاطاوعه
انا ما انكرش بأنى فرحت
و بقيت كده باهتم بنفسى
ويا مرايتى وقفت سرحت
يجى كام ساعه باظبط شكلى
و بقيت افرح لما بشوف
حد يبصلى بصة حيره
ما انا عاجباه و ده شىء معروف
خلّى صحابى يموتو من الغيره
و انا فى البيت شغاله اغانى
حاسّه شويه كأنى هاطير
و الدنيادى ماهيش سايعانى
عايشه فى حلم لكنه خطير
و فى لحظه ما خطرت على بالى
فقت انا من احلامى بسرعه
قلت لنفسى ايه اللى جراللى
ليه فرحانه و للسما طالعه
فين الوعد اللى وعدتيه
علشان حد ما ياكل عقلك
حا الوقت اللى تحافظى عليه
حاسبى لقلبك هيروح منك
مش علشان بصه اتبصتلك
تتبسطى و تطيرى م الفرحه
ده مهوش صح انا عايزة اصارحك
كله هيجى فى وقته يا فالحه
قلبك لسه صغنن نونو
حافظى عليه و لحد ما يكبر
اوعى لحد يزغلل عينه
ولا بأى كلام يتأثر
خلصت القصيده اللى بجد بحس انها مهمه جدا لكل بنت
بجد و الله لمسه كل بنت
و اكيد يعنى كل يوم بنشوف من الكلام ده كتير
بس تقريبا البنات ما بقتش تتأثر هههههههههههه
مش محتاجين القصيده دى فى بنات دلوقتى بقت بجد اصعب من الولاد عفاريت ربنا يدينا و يهديهم يا رب